Nima uchun aynan ö ğ ş ç

ö, ğ, ş, ç — toʻrtalasi ham turk alifbosida bor, uchtasi ozarbayjon alifbosida ham. Yangi belgilar oʻylab topilmadi, tayyorlari olindi.

Nega bu muhim

Eng koʻp beriladigan savol shu boʻlishi kerak edi, lekin uni kam soʻrashadi: “Endi shrift sotib olish, dasturlarni almashtirish kerakmi?” Javob — yoʻq.

Bu harflar Unicode standartining latin-ext qismida turadi. Turk va ozarbayjon tillari tufayli ular oʻttiz yildan beri barcha operatsion tizimlarning asosiy shriftlariga kiritilgan. Windows, macOS, Android, iPhone, Linux — hammasida bor. Word ham, brauzer ham, telefon ham ularni hech qanday qoʻshimcha ishsiz koʻrsatadi.

Agar oʻylab topilgan yangi belgi kiritilganida, ahvol butunlay boshqacha boʻlardi: shriftlar yangilanishini kutish, eski qurilmalarda kvadratchalar, bosmaxonalarda muammo.

Klaviatura boshqa masala

Shrift bilan hammasi joyida, klaviatura bilan esa yoʻq: standart lotin tartibida bu harflar uchun tugma yoʻq. Aynan shuning uchun biz tartiblar va koʻrsatmalar tayyorlaymiz — Klaviatura sahifasiga qarang.

Alifbodagi oʻrni

Harflar tartibi ham turk va ozarbayjon alifbolaridagidek berilgan: ç b dan keyin, ğ g dan keyin, ö o dan keyin, ş s dan keyin.

Bu dasturchilar uchun muhim: oddiy saralashda ö va ğ z dan keyin ketib qoladi, chunki ularning kod raqami kattaroq. Toʻgʻri tartib uchun maxsus solishtirish kerak — bu haqda dasturchilar uchun alohida sahifamiz bor.

Imlo qoidalarining yangi tahriri hali chop etilmagan, shuning uchun rasmiy tartib eʼlon qilinishi bilan jadvalimizni yangilaymiz.