Sayt yoki kompaniya hujjatlarini yangi alifboga ötkaziş

Bu sahifa matn bilan işlaydigan taşkilotlar uçun: tahririyat, naşriyot, kompaniya, davlat idorasi. Tartib şunday: avval eng arzon va eng foydali, oxirida eng qimmat.

1. Matn — bu eng oson qismi

Maqolalar, hujjatlar, subtitrlar. txt, md, csv, srt, vtt va docx fayllarini Fayllar sahifasiga bir vaqtda bir neçtasini taşlab, natijani yuklab oliş mumkin. Hammasi brauzer içida bajariladi: iş hujjati serverga yuborilmaydi.

Word hujjatida matn hujjatning özida tahrirlanadi — fayl qaytadan yiğilmaydi. Şuning uçun uslublar, jadvallar, rasmlar, kolontitullar va raqamlaş joyida qoladi.

2. Qidiruv — bu yerda köpçilik buziladi

Bazada Toshkent, foydalanuvçi Toşkent deb yozadi, mos keliş nolga teng. Yeçim bitta: soliştirişdan oldin sörovni ham, indeksni ham bitta şaklga keltiring. Qaysi biriga — muhim emas, muhimi ikkalasiga bir xil.

Buni bazani ögirişdan oldin qiling, aks holda saytingiz işlab turgandek körinadi, lekin heç narsa topilmaydi va sababini heç kim tuşunmaydi.

3. Saralaş

Odatiy saralaşda ö va ğ z dan keyin ketadi, çunki ularning kod raqami kattaroq. JavaScriptda Intl.Collator("uz-Latn"), PostgreSQLda COLLATE "uz-Latn-x-icu" kerak böladi. Buni unutsangiz, alifbo böyiça röyxatlar jimgina notöğri tartibda çiqadi.

4. Eski havolalar

Agar manzillarda sözlar bölsa — /maqola/toshkent-shahri — ularni ögirmang. Manzil özgarsa, eski havolalar öladi: qidiruv tizimidagi örin, boşqa saytlardagi ssylkalar, odamlarning xatçöplari.

Agar baribir ögirmoqçi bölsangiz, eski manzildan yangisiga doimiy yönaltiriş qöying va ikkalasini ham işlatib turing.

5. Bazadagi matn

Bazani bir marta ögiriş — eng xavfli qadam, çunki orqaga qaytariş qiyin. Tartib şunday:

1. Zaxira nusxa. Keyin emas, hozir.
2. Avval qidiruv va saralaşni tuzating (2 va 3-bandlar).
3. Kiruvçi matnni normalize("NFC") orqali ötkazing: ö bitta kodpoint bölib ham, o va qöşiluvçi belgi bölib ham keladi.
4. Kiçik bölakdan boşlang va natijani közingiz bilan köring.
5. Atoqli otlarni alohida tekşiring: Chelsea Çelsea bölib qolmasligi kerak.

6. Şriftlar — bu yerda iş yöq

Törtala harf turk va ozarbayjon alifbolaridan olingan va öttiz yildan beri barça tizim şriftlarida bor. Şrift sotib oliş, dasturlarni almaştiriş kerak emas.

Agar saytingizda öz veb-şrifti bölsa, unda latin-ext qismi borligini tekşiring: bölmasa, harflar boşqa şriftga ötib ketadi va matn notekis körinadi.

7. Öquvçi uçun tugma

Saytingizga bir qator qöysangiz, maqolangizda «yangiça körsatiş» tugmasi paydo böladi: öquvçi bir bosişda matnni yangi alifboda köradi va ikkinçi bosişda qaytaradi. Bu bazani ögirişdan ança arzon va orqaga qaytariş oson. Vidjet sahifasiga qarang.

Muddatlar haqida

Qonun prezident imzosidan keyin kuçga kiradi, sohalar böyiça muddatlar esa qonunni amalga oşiriş dasturida böladi — u hali yozilmoqda. Yaʼni şoşilişga sabab yöq, lekin qidiruv va saralaşni hozirdan tuzatib qöyiş arzonroq: keyin ular ustiga ögirilgan baza qöşiladi.