Asosiy qismga ötiş
yangiça
Til

· 3 daqiqa öqişga

Prezident yangi alifbo haqidagi qonunni imzoladi

2026-yil 21-oktabrda, Özbek tili bayrami kuni, prezident Şavkat Mirziyoyev lotin yozuviga asoslangan özbek alifbosini takomillaştiriş töğrisidagi qonunni imzoladi. Bu haqda Prezident Administratsiyasi rahbari Saida Mirziyoyeva xabar berdi.

Qaçondan

Qonun rasman eʼlon qilinganidan olti oy ötib — 2027-yil 22-aprelda kuçga kiradi. Ungaça heç narsa majburiy emas, lekin yangi alifboda yozişni bugunoq boşlasa böladi.

Alifbo qanday böladi

Ilgari 26 ta harf va 3 ta harf birikmasi bor edi, endi 28 ta harf va tutuq belgisi ʼ.

  • Oʻ oʻ örniga Ö ö
  • Gʻ gʻ örniga Ğ ğ
  • Sh sh örniga Ş ş
  • Ch ch örniga Ç ç

ng alohida harf sifatida alifbodan çiqariladi, matnning özi esa özgarmaydi.

Eski yozuvdagi narsalar nima böladi

  • Hujjatlar, milliy valyuta va qimmatli qoğozlar öz kuçida qoladi.
  • Davlat organlarining ramzlari, binolardagi gerblar, geografik nomli peşlavha va körsatkiçlar yaroqsiz holga kelgunça yoki dasturda belgilanadigan muddatgaça işlatilaveradi.
  • Darsliklar, peşlavhalar va körsatkiçlar yaroqlilik muddati tugagaç bosqiçma-bosqiç almaştiriladi. Saida Mirziyoyevaning sözlariga köra, bu yöl xarajatlarni eng kam darajaga tuşiriş uçun tanlangan.

Keyin nima böladi

Hukumat qonunni amalga oşiriş çora-tadbirlari dasturini işlab çiqadi. UzDaily maʼlumotiga köra, buning uçun ikki oy berilgan. Sohalar böyiça muddatlar öşa dasturda böladi.

5-noyabrda Gazeta.uz bilan suhbatda Fanlar akademiyasi Özbek tili, adabiyoti va folklori instituti tilşunoslari Yorqin Odilov va Zohida Muqimova Vazirlar Mahkamasining qarori tayyorlanayotganini aytdi. Ularning sözlariga köra, alifbo bosqiçma-bosqiç joriy etiladi va heç kim heç narsaga majbur qilinmaydi. Odilovning taʼkidlaşiça, atigi törtta harf özgaryapti, şuning uçun çalkaşlik kutilmaydi.

Imlo qoidalarining yangi tahriri hali eʼlon qilinmagan. Isʼhoq kabi sözlardagi ajratgiç masalasi hozirça oçiq.

Bugun nima qilsa böladi

Kutiş şart emas. Konvertorimiz matnni uçala yozuv orasida ögiradi va uni serverga yubormaydi, klaviatura sahifalarida esa yangi harflarni qanday yoziş körsatilgan.

Manbalar